你話你唱歌似關菊英？我夠話我係將軍澳關心妍咯！想試自己實力？又唔使話拋頭露面走去「生銹」嘅，喺屋企玩呢隻《Lips》都可以睇吓自己唱歌幾高分、有無天份。唱之餘，仲可以用手掣扮搖鼓、拍手打拍子，適當時候FingFing支有體感裝置嘅咪又有分加。
文︰崎哥
攝影︰陳盛臣
做歌手露兩手
入碟播歌同唱K無咩分別？梗係唔係啦！除咗唱完有電腦計分之外，支咪都有體感功能，專用無線咪可以偵測玩家嘅搖動，唔同段落畫面都會提示你要做咩動作，舉咪、Fing咪跟住做，台風啱Feel就加你分。
當唱不同節奏歌曲，無線咪會跟節奏發出唔同顏色閃爍燈光，好似《男歌女唱》家用版。而且更可加入特別音效及轉Key，最多可用埋兩支無線咪合唱，又係一隻媾女極品囉。
做Fans要拍手
遊戲除咗支援最多兩支咪外，仲可以配合4個無線手掣齊齊玩，只要Set定手掣嘅音效，嗰4條友跟住節奏㩒掣就會有搖鈴聲、電子合成音樂聲等不同效果，最搞笑係你仲可以做Fans扮拍手聲幫你「偶像」打拍子，加埋杜比5.1數碼音效輸出，紅館未裝修好都可以好似開演唱會咁款。我真係好鍾意唱歌呀！我情願做一晚歌星，都唔要做一世烏蠅！
連線Live!有新歌
《Lips》內置超過40首歌，包括流行曲、HipHop、經典金曲都有，例如Beyonce嘅《Irreplaceable》、Coldplay嘅《Yellow》、Radiohead嘅《FakePlasticTrees》等英文歌。另外廠方亦認頭話會於XboxLIVE提供最新歌曲下載服務，玩家可以隨時連線選擇自己喜愛嘅新歌，同時亦可透過USB接駁指定MP3擴建遊戲歌庫。
Profile
遊戲：《Lips》
語音：英文
字幕：英文/中文
推出日期：2009年1月8日
售價：$499（連兩支無線互動咪）
