無綫節目《慈善星輝仁濟夜》今個星期六舉行，一班有份演出嘅歌手藝員噚日齊集奧海城宣傳，不過歌手中都有分新舊黨派，好似薛凱琪、鄧麗欣（Stephy）同吳雨霏（Kary）就經常一齊；新人組合Hotcha、賈曉晨（JJ）同裕美就一堆。
原來薛凱琪係城大師姐，同倪震啜爆嘅張茆豈不是同門？薛凱琪一聽到張茆個名即刻劃清界線話：「我畢咗業多年，唔識佢噃！」講到師妹態度開放，薛凱琪斬釘截鐵話：「唔關邊間大學事，係某啲年輕人問題，開唔開放冇所謂，最緊要個人有價值觀同道德。」
Stephy自封白果王
另外，講起近排嘅樂壇頒獎禮，Stephy都兩手空空，佢話預咗食白果，仲拉埋方力申落水，自嘲係白果王情侶檔，Stephy話：「自己對舊年樂壇成績的確唔滿意，因為擺太多時間喺電影方面，嚟緊都會同公司反映，希望平均番啲。」馮仁昭覺得有戲開仲好過唱歌啦，起碼片酬夠實際，Stephy話：「咁今年嘅獎金都幾滿意㗎，開咗四部電影，但冇獎品囉，會計劃今年買樓。」