美國eBay前行政總裁惠特曼（MegWhitman），雖然離開公司接近一年，但傳媒仍然好留意佢嘅動向，最新消息話，佢連eBay董事都唔做，專心為角逐加州州長鋪路。
據消息指，惠特曼舊年離開eBay後，仍孭住寶潔、夢工場同eBay嘅董事職銜，不過今年就唔會續任。
雖然佢嘅公關冇解釋原因，但知情人士透露，原來惠特曼向來都有意從政，但一直都心大心細。
由於大隻佬阿諾舒華辛力加嘅州長任期將於明年屆滿，依法不能再連任，惠特曼早前趁假期諗清諗楚後，決定去馬，因此辭咗多家公司嘅董事職銜，為明年參選加州州長作出部署。
麥凱恩屬意財長人選
事實上，自從惠特曼去年3月唔再擔任eBay行政總裁後，市場就一直傳佢有意接阿諾舒華辛力加棒，聽講佢更一度被美國總統參選人麥凱恩，視為心目中嘅財長人選。