執輸行頭慘過敗家，呢個世界最緊要夠醒，唔係就蠢過隻豬！外號「小豬」嘅拜仁球星舒韋恩史廸加，日前喺阿聯酋參觀動物園發生走甩豹意外，佢居然連走佬都慢過人，咁唔得醒，唔怪得肯低價同拜仁續新約。
話說拜仁周日抵達杜拜進行為期11日嘅冬訓，首日先去皇室私人動物園參觀。班球員同小白獅影相時，突然傳來廣播話走甩花豹，佢哋聽繙譯講完紛紛搵地方匿。列貝利衝向附近廁所；東尼亦唔顧儀態緊隨在後；雲拜頓亦縮埋一舊衝埋入去，仲順手閂埋度門。點知門外傳來敲門聲，唔通杜拜啲豹聰明到識敲門？
同拜仁傾續約也執輸
原來係「小豬」走得摩，好可惜廁所已經塞唔落第4個猛男；「小豬」危急之際睇到附近仲有個房仔，於是匿咗入去。5分鐘後隻豹被職員捉番入籠，好彩冇人受傷。正所謂危急見本性，我求大俠覺得「小豬」唔夠醒目，唔怪得際遇麻麻啦！我求大俠就攞轉會做例，「小豬」合約季尾屆滿，原本皇馬、巴塞等都想佢加盟，夏天實可以高薪轉會。點知「小豬」居然喺上月中同拜仁續約，人工雖則加咗，但去唔到佢要求嘅年薪600萬歐元，得500萬歐元都唔夠，你話係咪蠢過隻豬？
列貝利世界仔𠱁球會
至於最近當選《踢球者》雜誌08年風雲人物嘅列貝利，亦好識幫自己賣廣告，佢喺受訪時藉機向其他豪門示愛：「拜仁係世界最好球會之一，但皇馬、巴塞、車仔、曼聯都一樣，我梗喜歡皇馬，不過我喺拜仁好快樂，以後發生咩事好難講。」我求大俠聽聞拜仁會提早同佢續新約，𠵱家佢咁講，拜仁肯定識做加佢人工，年薪隨時由家陣嘅480萬歐元，跳升到600至650萬歐元都未定。
拜仁教練奇連士文本身亦係醒目仔，今次帶隊去中東集訓，打兩場熱身賽寓操練於賺錢，球員亦邊放假邊練習，相信可以好快操番起狀態。