星期日同個之前喺銀行做privatebanking嘅auntie飲茶，佢喺今次金融海嘯下，俾公司叫佢提早退休。
同佢傾開以前喺銀行時嘅工作，auntie話，讀CFP（財務策劃師）時計數計到儍，又要計投資回報，又要顧通脹，仲要諗埋個client有幾多頭住家，先至可以幫佢計到retirementplan，「敏妮，如果喺現實世界，我好似廣告裏面個李麗珊咁同個客講，養一個細路要400萬，然後攞部financialcalculator出嚟喺個客面前㩒條數，唔嚇走個客都悶死個客。」
最緊要幫客贏錢
當然幫個客計數係佢嘅工作，但佢好老實同敏妮講，最重要係可以令個客畀筆錢你做投資，而你攞住筆錢又真係可以幫個客賺到錢，等佢繼續喺你度開戶口，「敏妮，好彩我都幾好運，幫啲客贏到錢，連啲客都話我旺佢哋」。
Auntie咁講，會令人將CFP嘅專業睇成為sales，但香港人習慣即食文化，就好似敏妮都收過唔少朋友嘅問題，話想幾多年後就有幾多百萬退休，應該點樣做？
首先佢有冇諗自己活幾耐？幾百萬夠唔夠退休？𠵱家幾百萬嘅購買力，十年後仲有冇咁嘅購買力呢？
問多兩問，個朋友都一臉唔耐煩，難怪auntie以「目標為本」，總之信得佢過，就畀筆錢佢投資。
運氣靠唔靠得住
敏妮聽完auntie一席話，有感而發。如果照佢所講，咁點解要咁辛苦讀埋咁多專業資格？好以韋小寶咁一世有運行咪得囉！問題係，運氣靠唔靠得住？
溫敏妮
http://wanmanli.com/blogs/