啱啱做咗民主黨副主席嘅卿姐，去年聖誕節期間接受NDI（美國全國國際事務民主學會）邀請，喺平安夜出發去孟加拉首都達卡，以國際監察員身份監察當地大選。
卿姐話同香港比較，達卡選舉安排無疑較為落後，選票用木頭車運送，點票全人手處理，不過無損選民投票熱情。卿姐指投票日好多票站外都有長長人龍，有人要排成日隊投票，女士更會打扮到靚一靚，好似去飲咁，當地人話係因為大家高度重視選舉，卿姐話目睹呢啲場面，令佢既震驚又羨慕，希望香港人都可以咁熱衷投票。去到孟加拉，卿姐向當地人表示自己冇回鄉證唔可以自由到中國，對方聽到後大表驚奇，估唔到一國兩制原來係咁，都戥佢唔抵。