雖然紅色資本家榮智健自爆中信泰富（267）炒燶外滙勁蝕後，曾經同傳媒講，話𠵱家唔係辭職離開嘅時候，暗示搞番掂間公司至係負責任嘅表現，但早排中信泰富開股東特別大會時，華華同佢哋副董事總經理李松興傾開，覺得即使救得番，公司形象都有排至可以修補好。
母公司擬再派人入局
李生總結成件事，話自己覺得「好醜」。咁即係話董事局都知衰，希望盡力挽回敗局，而唔係刻意賴死唔走。
之不過，出手拯救嘅中信集團最初唔係咁諗，據《財經》雜誌引述知情人士話，覺得當初處理時「不夠果斷」，未有要求中信泰富管理層即時辭職，至導致目前嘅「被動」，𠵱家中信集團做咗大股東，將會加強佢哋嘅公司管治，可能派實權人物進入董事局，中信集團副董事長兼總經理常振明、常務董事兼副總經理李士林已分別做咗非執董同執董，又派埋總經理助理張極井睇數，華華都好想知佢哋仲會派邊個坐鎮中信泰富呢？
知情人士仲話，中投最初本嚟有意收購中信泰富，但最終未能就細節達成共識作罷喎。唔通佢哋睇到一啲冇乜人知嘅嘢？