韓國男星宋承憲近日憑劇集《伊甸之東》勇奪MBC演技大獎頒獎禮嘅終極大獎，事業再創高峯，人氣當旺嘅憲哥噚日拍住劇集《茶煲阿四》女星韓藝瑟齊齊搵真銀，現身首爾為代言嘅LG雪櫃宣傳。韓藝瑟着住棗紅色露肩晚裝，對住雪櫃大擺S形甫士，鬼咁搶鏡。另外，《伊》劇前日以28%收視繼續冧莊收視冠軍，而韓國女星具惠善主演嘅新劇《花樣男子》，首集有14.3%收視，屈居第二。