機場地勤公司（HAS）勞資雙方就獎金問題通宵談判，傾到噚日凌晨4點鐘，日出前終於露出曙光。八方聽聞勞工處處長謝凌潔貞通頂注視談判進展，一知道雙方傾掂數，即時趕去現場，向雙方噓寒問暖握手打氣。
工潮、家暴條例殺埋身
處長要捱通宵，八方聽聞佢頂頭上司、勞工及福利局局長張建宗都冇覺好瞓，全天候留意談判情況。官場中人稱，張建宗近來可算冇日安寧，失業率高企、工潮一觸即發固然令佢頭痛，加上忽然多個火頭，家暴條例修訂起爭議，亦令佢愁上加愁。
上屆立法會對家暴條例有共識，應該保障埋同性同居人士，張建宗先至提出修訂，點知選舉後有人想推倒重來。有議員同八方講，張建宗私下對此皺晒眉頭，因為政府就修訂做咗好多工作，議員忽然轉軚，對政府唔係幾公道。
呢單嘢張建宗顯然唔想接波住，等各黨講掂數先算，正所謂清官難審家庭事，順得哥情失嫂意，得罪同志組織好麻煩，激嬲宗教團體更大鑊，有差池分分鐘引火自焚，家嘈屋閉佢想瞓都難，屆時各路人馬群起聲討，佢仲慘過綁鬧鐘上身，永無寧日都似。
地勤公司工潮驚動煲呔，因此勞福局同勞工處都嚴陣以待。工潮平息，煲呔噚日即刻同處長謝凌潔貞出巡，去天水圍招聘會睇吓最新情況。
煲呔唔消費玩保工騷
可能近日高官消費騷做得過火俾人鬧得多，煲呔改做「保工騷」，佢話會盡力幫年輕人搵工，又呼籲企業唔好隨便裁員。
八方希望煲呔另起爐灶成立嗰個經機會嘅成員，都聽佢支笛，因為經機會成員嘅幾間大公司，裁員手起刀落快夾狠。講開天水圍，煲呔日前同議員飯局，席間李卓人要求政府部門唔好掃蕩天光墟，好似天水圍天欣邨旁個天光墟，因為好多小市民靠做小販搵兩餐，阿人又提議喺附近公園加設公廁，方便晨運老人家。
據講煲呔叫阿人放心，因為食環署近日已手下留情，至於加建公廁，煲呔卻話不必，更話自己都去過嗰度跑步，老人家晨運前去廁所，就唔怕人有三急，更笑言長者應該冇食K仔，唔使15分鐘就去一次廁所。
mailto:[email protected]