奧巴馬出招，話要喺兩年內減稅3000億美元，如果落實，對短線嘅經濟會係好消息，將來會唔會引發通脹係將來嘅事，不過花旗股市前晚就下跌收市，反映股民都係醒目嘅，趁好消息出貨。
港股3日升咗千幾點，噚日終於唞唞，恒指反覆下跌53點收市，報收15509，有銀行減樓按息率，地產股成為支撐大市嘅主力，中資股就個別發展，港股整固後可再升。
中煤C輪15234：中煤（1898）昨收7.50元，升5.7巴仙，股價升破100日線收市，炒上去睇9.50元，可以諗吓隻C輪15234，昨收19.1仙，有效槓桿2.2倍，正股升上9.50元，15234可見31.6仙，就算打個8折，都有5成升幅，正股跌穿6.80元，就沽咗隻輪止蝕。
俊樺