提起法國長麵包，只會想起一個字：「硬」！它表裏如一，猶如棒球棍的外表，有如咬蔗的質感，未食已經牙骱軟。不過，在越南人的「改良」下，配上鮮味的扎肉、酸蘿蔔絲等，再灑水放入焗爐焗一陣，則變成外脆肉軟的人間美味。在香港要食越式法包，添記之外，原來美食天堂上最新又多了個「山地人」。
記者：周靜雯
攝影：梁細權
老兵獻計夾沙甸
越式法包不外乎這幾種穩膽餡料：扎肉、越南泡菜（酸蘿蔔、青瓜）、牛油及沙律醬等，不過炮台山的「山地人」，老闆楊生才20歲出頭，特別多新「煮」意！「香港人始終喜歡試新嘢，多點選擇會較好。」單是麵包已有3款，除原味外，還有高纖的黑麥芽及創新的竹炭口味，「其實麵包裏加入了少量竹炭粉，味覺敏感的朋友更會食到竹香！」據聞竹炭可以排毒，成效不得而知，但就肯定夠創新。越式法包本是街頭小吃，楊老闆就加入新鮮鵝肝醬，令三文治既矜貴又惹味。選好包再選主要餡料，人客可從豬肉、雞肉、肉鬆及香菇中揀兩款。最近更有新口味沙甸魚三文治，「之前有個越南老兵同我講，可以夾沙甸魚，試做發覺真係得！」原來夾沙甸魚是法國人的食法，這次真正來個越法crossover，已拆骨酸酸的沙甸魚加上香脆法包，啖啖肉夠開胃，話咁快就吞晒落肚！
用味覺感受越南
開業4個月已贏到一班食客歡心。楊生留學澳洲時就是以越式法包祭五臟廟，「當地好多越南華僑賣越式法包，我食過一次就愛上。」眼見香港難以食到好的越式法包，加上留學時又在越式三文治專門店兼職1年，便決定自己開舖。這裏亦有售越南「滴滴咖啡」，同樣是由法國人傳入，配上煉奶是越南地道飲法，邊吃包邊飲，可以用味覺感受越南！
新味!
新口味沙甸魚三文治，乃傳統法國食法，這個新×舊+法×越crossover，產生美味化學作用。（$33）
必食!
特色越南法包可選兩種餡料，小記特別喜歡豬肉加肉鬆，肉鬆香口，豬肉爽脆，吃辣的朋友更可加辣，是必食之選！（$33/配兩款餡料）
OL至愛!
竹炭味法包適合喜歡試新口味的朋友，而黑麥芽法包就是不少OL的至愛，夠健康嘛！
老闆特製!
鵝肝醬是楊生親自炮製，放在越南又一美食「蒜茸包」上，焗時整間舖都聞到香味。（$18）
山地人越南法包專門店（26600119）
炮台山宏安道2-12號地下9號
營業時間：7:30am-10:00pm
脆足20年：添記餡料
老字號添記位於佐敦渡船角，開業已20多年，雖經過易手及搬舖，但現任老闆范生及許生93年接手，一直沿用上任老闆教他們的做法，「越南傳統的法包會有鹹豬手、五香腩、扎肉及嚼肉，除了扎肉，其他都是自家製。」鹹豬手以香茅醃味，五香腩用花椒八角煮成；而嚼肉就是豬肝加豬肉攪碎製成，入口即溶的感覺似足鵝肝。能夠脆足20多年，范老闆指法包的質素成為關鍵，「法包本身很難做得好，要皮夠薄，焗出來才不會硬，一條靚的法包未焗前應該軟熟有彈性，硬晒的點焗都無用！」
添記法包餡料豐富，吃時較狼狽，范老闆教大家只要食前將三文治按壓一下，可壓實餡料，較易入口。（$21/細、$40/大）
食客林先生
我本身是越南華僑，這裏的法包很有越南味道，經常專登過來幫襯。
添記（23857939）
佐敦渡船角文苑街文耀樓30號A座地下
營業時間：11:00am-12:00mn
