北角新光戲院嘅續租問題懸而未決，粵劇界人士隨時冇地方開鑼，心急如焚，八和會館正、副主席汪明荃同阮兆輝，噚日雙響炮狂轟政府，七情上面狠批高官迫死香港粵劇，又指前民政事務局局長肥平反應快，𠵱家個德成局長就一味嘆慢板，煲呔仲衰到不聞不問。
轟特首唔重視粵劇
阮兆輝噚日同八方講，政府一直認為續租問題係商業糾紛，政府介入可能俾人視為官商勾結，不過佢指新光租約關乎本地粵劇界存亡，政府應特事特辦，雖然政府已經撥款1.2億元改建油麻地戲院舊址做粵劇戲曲中心，但嗰度僅300個座位，同新光戲院有成千個座位冇得比。
汪阿姐話特首、高官、議員都唔重視粵劇，阿姐話如果煲呔肯開金口，相信業主會有商量。若果傾唔掂新租約，估計農曆年後冇得開鑼，戲班冇地方演出，業內好多人要失業。阿姐又指就算有第二個人申請新牌開戲院都無補於事，事關新光戲院有幾十年歷史，入紙申請新牌照，又要等政府部門重新審批消防、建築設施，搞完一場大龍鳳，都唔知幾時可以響鑼鼓。