亞視去年底忽然上演12日「維新」風雲，「魔童」王維基同「名妓」張永霖本來想做齣好戲，點知王維基黯然出局，只留低質疑亞姐胸部真偽名言供觀眾回味，暫時獨撐大局嘅執行主席張永霖，早前直指兩份左報《文匯》、《大公》冇公信力言論令人記憶猶新，佢噚日自爆為此補鑊，登門向兩報負責人道歉。
辣㷫愛國傳媒要謝罪
張永霖噚日見記者講亞視最新情況，簡而言之情況不妙急需輸血，講到新聞部運作問題，佢主動提及早前先後同《文匯》、《大公》負責人見面，親自向兩報高層道歉，因為佢之前喺員工大會上，直指兩份左報冇公信力，指示亞視新聞千祈唔好學，否則冇人會睇。
忠言逆耳，真話永遠都係難聽嘅，呢番言論，唔單止辣㷫本地愛國傳媒，據講同北京關係良好嘅亞視大股東查家都唔啱聽，難怪青樓名妓要上門謝罪。張永霖噚日暗示始作俑者係魔童，若非魔童將員工大會片段上網，就唔會搞出呢次風波，搞到佢要面懵懵認錯。
有亞視員工同八方講，其實內部對張永霖批評左報冇乜意見，因為打工仔最關心始終係飯碗問題，張永霖錯在口不擇言，𤓓到要上門叩頭係錯上加錯，事關張話亞視唔應該學左報呢個道理係冇錯，呢位員工講笑話，張永霖走去認錯，唔通亞視真係要學左報？有時錯唔可以亂認！
張永霖則話都有同左報高層傾吓如何做傳媒，佢話好多員工建議佢學TVB陳志雲咁撈埋幕前，不過佢就冇興趣搞飯局，如果員工有好橋，歡迎寫份三年計劃書畀佢，如果個節目可以做到三年又搵到錢，佢會考慮粉墨登場。
八方唔知有冇亞視員工咁好心機寫proposal，反而想知道張永霖寫唔寫到一份三年業務計劃書，仲要真係搵到錢、保證提高到收視率嘅proposal畀查家，如果咁把炮，六叔應該快啲撬佢過檔。除咗唔搞飯局，張永霖又聲言唔做炒股節目，好反對喺電視教師奶炒股。其實張永霖自己係投資老手，08年好多人損手，佢都有微利，佢係港大專業進修學院校董會主席，去年個市咁波動，學院儲備一毫子都唔使蝕，又話估計未來十年八載，股市都係大上大落格局，炒家小心。
mailto:[email protected]