08年金融海嘯導致全球經濟急劇下跌，唔少人投資損手甚至失業，一片愁雲慘霧。踏入09年情況仲未見底，令到金管局總裁任志剛想同人拜個早年時都口窒窒，佢話只可以同人講聲身體健康。
噚日任總應中總之邀，出席09香港工商業研討會，展望今年香港經濟情況。
佢話肯定會向下，而美國經濟嘅冬天只係開始，嚴冬仲未到，可以預期未來半年至9個月唔會好過，搞到佢同人拜早年時唔可以隨便講恭喜說話，好似「萬事如意」就肯定唔貼切，唔好有太多不如意事已經好唔錯。
聯滙脫鈎要問財爺
會上，再有人問任總幾時將港元同美元脫鈎，佢亦再強調，聯繫滙率係香港金融穩定基石，尤其𠵱家風大雨大，「仲搞咁嘅嘢？」
不過，佢好風趣話聯滙改唔改，權力喺財爺手，所以「我講嘢唔能夠作準！」