上市保薦人搵錢多係人都知，但佢哋孭嘅責任都唔輕，若果瞌眼瞓睇漏嘢，隨時搞到一身蟻。噚日證監會一宗執法公佈，就係活生生嘅例子。
證監會公佈，禁止中國光大融資前董事總經理胡景卲重投業界兩年半，上個月29號開始生效，即係佢要等到2011年6月底，先可以重出「缸」湖。
今次紀律處分事緣4年幾、5年前，光大擔任東大照明（8229）保薦人，幫呢間創業板公司申請轉主板掛牌期間，證監發現東大遞交嘅文件裏面，載有多項嚴重不確嘅資料，如果胡景卲當時有作出適當監督，就可以發現同埋避免有關錯誤。
結果係點？東大唔單止放棄咗轉板，仲喺04年7月29日起停牌，之後公司3位管理層因涉嫌造假數，俾商業罪案調查科拘捕，最後獲無條件釋放，亦冇被檢控。之不過，間公司到家吓都係復牌無期。