無綫即將舉辦兩項籌款活動節目，將節目製作成《東華愛心獻歡騰》，噚日一班東華主席聯同有份演出藝員葉翠翠、湯盈盈、趙碩之、戴夢夢同新人尹蓁晞等喺尖沙嘴美麗華酒店宣傳，大會原先安排演員喺台上將金幣投入氣球再用身體傳遞，不過趙碩之同戴夢夢淨係識得喺台上笑，而趙碩之師妹尹蓁晞就晒胸搶鏡。
葉翠翠小心言行
有愛情滋潤嘅盈盈，噚日心情大靚，經過涉嫌醉駕事件後，馮仁昭見盈盈同錢嘉樂戀情日漸浮面，趁農曆新年見家長係好時機，盈盈不置可否話：「順其自然，唔使專登。」果然非一般親密關係，不過盈盈強調未見過家樂家人，連佢阿哥錢小豪都話未見過，又話𠵱家罰自己唔揸車，馮仁昭都估佢一定有樂樂接送啦，點知盈盈笑笑口話：「未坐過佢車喎，唔知會唔會好危險呢。」
葉翠翠自從復工後每逢出席宣傳活動都避開傳媒訪問，俾人感覺好似囂咗，翠翠冇有怕話：「我𠵱家都同大家做訪問啦，唔想理呢啲傳聞，總之自己各方面都會小心啲。」