曼聯球星基斯坦奴朗拿度（C朗）深得領隊費格遜寵愛，好似上場聯賽對米堡後，就特准佢返葡萄牙馬德拉島嘅鄉下度假。不過C朗一啲都冇偷懶，仲去海邊玩插水，寓娛樂於練習，以免荒廢呢門絕技，認真生性！
葡國小島唔係太冷
C朗老家喺馬德拉島嘅豐沙爾，呢個小島位於大西洋、近住北非。上周六，佢就同老友去到海邊，跳水、插水玩個不亦樂乎，個個動作熟口熟面，睇真啲同佢場上插水動作一模一樣。放大假都不忘練習絕技，難怪費Sir錫到C朗燶啦！
葡萄牙正值冬季，馬德拉島當日氣溫介乎攝氏14至18度，水溫17度左右，我求大俠天生怕凍，所以好佩服C朗嘅勇氣。不過，當地島民自細與海為友，游水、插水功夫一流，如今C朗將地道伎倆，應用落足球度，仲發揚光大，直情係島民之光啦！
特准叉電蓄銳鬥「車」
C朗插得開心，領隊費Sir亦心情暢快，球隊周日英足盃3:0擊敗修咸頓晉級，向4冠王進發！C朗周日場波唔使踢之餘，仲可以返祖國跳吓水、度吓假，實行叉足晒電，佢稍後就會歸隊，參加嚟緊11號聯賽對車路士嘅大戰。
唔知C朗喺馬德拉島練插水時，個樣有冇keep住扮痛嘅表情呢？呢樣嘢球證好講印象分，C朗個樣再乸口乸面啲，落地再打多幾個觔斗嘅話，博罰球機會又多啲㗎嘛！相信，C朗呢排經過阿媽嘅湯水滋潤，以及插水練習後，狀態同表現肯定大有改善，車仔班後防球員有排受，應該話對住一個「唞」夠、練完插水兼叉足電嘅C朗，就更加難「嘜」咯。
泰維斯扭加人工聽潛水
C朗happy到震，隊友泰維斯就閉翳啦！話說佢嘅經理人已經同曼聯達成3,200萬鎊（約3.6億港元）嘅轉會費協議，不過佢居然要求同C朗同等嘅12萬鎊周薪，與會方提出嘅8萬鎊相差好遠；就咁成個談判僵持不下，周日英足盃對修咸頓連後備席都冇份坐。
我求大俠覺得泰維斯真係要向C朗學吓插水，咪吓吓撐到行先得㗎，今時今日咁嘅環境仲獅子開大口？如果以佢上季嘅表現同經濟環境開口，都仲有啲可能。咁嘅時勢就最好潛吓水，爭取好表現再博轉會，先係王道呀！