09年都只係過咗幾日，但財金界嘅音樂椅遊戲原來早已展開。噚日，華華收到招商證券嘅新聞稿，話喺舊年大約8月時離開交銀國際嘅Ronald溫天納，經已過咗檔去招商證券，做投資銀行業務嘅董事總經理，重點工作係協助招行喺香港全方位發展投行業務喎。
其實，Ronald除咗努力搵銀之外，仲對學術界好有heart，𠵱家喺中國人民大學做講座教授，仲係中國高校聯香港金融協會副主席㖭。唔知佢有冇借呢個機會，喺內地搵番一兩件金融才俊嚟幫手呢？
孖生兄弟會去邊
講開又講，先前華華都係睇電視，見到溫天納個「朵」由交銀投資銀行董事總經理，變咗做資深投資界人士，先知佢冇做交銀。𠵱家溫天納就有着落，咁佢個孖生兄弟溫天絡，喺09年又唔知有冇新動作呢？