啱啱過去嘅08年對好多人嚟講雖然唔係好「老利」，但對民建聯葉國謙嚟講就應該係好年，一來佢一雪前恥終於當選重返立法會，二來仲趕上尾班車做咗08年老爺，29歲兒子上年底同女友拉埋天窗，阿謙舉家遠赴紐約飲「恨」咗多年嘅新抱茶。
阿謙兒子喺美國做市場管理，佢透露新抱係香港人，喺紐約做設計師，兩人因此異地結緣。飲完新抱茶，佢笑言覺得都係香港結婚好，因為當地儀式一切從簡，香港結婚雖然多啲繁文縟節，但感覺上比較莊嚴。
阿謙話榮升老爺好開心，想唔想抱孫佢不表態，怕俾壓力個仔。參加婚禮後，個仔兩公婆自行度蜜月，佢就同太太、女兒去邁亞密度假充電。阿謙孖生細佬葉國忠去年尾娶新抱，兩兄弟咁啱同一年做老爺，雙喜臨門。