癡看：你咪當我儍

HelloKitty、米奇老鼠多擁躉，不怪，喜歡儍豹，算較冷門了吧。Wing做過麥記CMGirl，當過旅遊版記者，以為正正常常，誰知她癲到專誠帶豹哥仔周遊列國，每次派對必以儍豹Look贈興。不禁想問，是儍豹儍，還是她儍？

記者：蒙為亮
攝影：林栢鈞

狂迷編號：020

姓名：Wing（25歲）
職業：公關
年資：5年
總花費：保守估計10萬
最珍藏：今年爸爸送的自製儍豹八達通手機繩
最難忘：本地品牌Tradition設計師HimHui是她朋友，專為她設計了一個儍豹Logo
夢想：買下所有儍豹Product，開一間儍豹專賣店

甜蜜定情信物

Wing笑言自己鍾情儍豹，源自一個愛的故事，不過女主角非她本人，而是她媽媽，「由出世開始，唔知點解身邊總有隻巨型儍豹俾我攬住，細個當然無findout乜原因啦，當佢一隻普通毛公仔有得攬就攬，後尾攬攬吓，隻儍豹又唔知點解唔見咗。五年前，我因工作關係去日本大阪環球影城，見到有隻差唔多樣嘅儍豹，咪買返屋企擺囉，點知一入門口，媽咪見到我攬住隻儍豹，竟然感動到喊，問番先知原來由細到大我攬住嗰隻儍豹，係爸爸送畀媽咪嘅定情信物，係唔係好Sweet呢？」自此Wing和儍豹結緣，說着說着，發覺她暗露甜思思表情，立即追問男友有否送她一隻大儍豹做定情信物，「呢啲嘢唔好講啦，其實，都……都有囉，哈哈……」說時一面腼腆，但笑聲卻是十級甜蜜。

■在大阪環球影城，Wing死攬住儍豹不放。

無厘頭交朋友

拍照時，見Wing睡房一片粉紅，儍豹Product多得可以開間精品店，是男友送的吧？Wing高八度說：「我唔係一般港女，唔係成日要扭男朋友買乜買物嗰種女仔，未迷儍豹前，我根本唔鍾意粉紅色，因為粉紅色其實都幾姣吓。可能我爸爸係警察啦，由細到大我都比較男仔頭，鍾意打波同游水，大個咗先似番個女仔，哈哈。」男仔頭變靚女，女大十八變，原來全因一隻儍豹。
「其實我係個天生購物狂，乜都買一餐，可惜吖，香港有得賣儍豹嘅地方唔多，貨量同款式又比較少，除出Trip入貨，好多時我都要靠上網Bid貨。」Wing直認每日上班第一件事，就是亮着電腦，上eBay、Yahoo的拍賣場掃貨，還要整日留意有無對手和她鬥出價搶貨，不過這種病態式瘋狂也令她交到不少儍豹Fans，「我周不時都會Upload自己啲儍豹相上Blog，有日行行吓銅鑼灣，突然有個肥妹仔大叫：『阿Wing！』我同佢素未謀面，以為佢認錯人啦，點知佢即場送咗隻儍豹畀我，仲話係我Blog友，當時我真係O晒嘴。事後諗番，又覺得好開心，算識多咗個朋友，好多謝佢送隻儍豹公仔畀我。」

■本相約在Wing的家集合，忽接她來電：「喂，不如喺地鐵站Join咗先。」以為約了誰，原來約了網上買家交收，她的生活，無時無刻也有儍豹在。

■客廳好整齊，與睡房那Fullpink儍豹小天地，差得遠了。

英美日籍各有性格

其實訪問前，Wing已千叮萬囑我，不要把她寫成儍，因為她真心喜歡儍豹，還替儍豹來一次大反平，「儍豹雖然好Pink，一般人睇會覺得好姣，又會覺得佢扮可愛懶Cutie。不過咁喎，上年CommedesGarcons都有同儍豹出Tee喎，呢啲係潮！仲有呀，唔同國家嘅儍豹都有唔同性格特色，英國儍豹古肅一啲，唔多笑，着住件亁濕褸懶正經咁款，日本同美國儍豹就鬼馬啲，個樣好似好蠱惑咁。」就憑以上對白，可見她中毒已深，連儍豹的性格都來個大起底。她聲言會繼續儲儍豹產品：「我想再儲多啲，將來開一間專賣儍豹嘅舖頭，裏面擺好多『只供欣賞』嘅非賣品，等其他人得個恨字，哈哈。」開舖頭，但又賣根本不賣的非賣品，這間舖頭肯定蝕本啦，不寫她儍，寫她癡總可以了吧。