36歲的古巨基入行14年，前晚終於奪得最受歡迎男歌星獎，他在台上喜極而泣，並多謝緋聞助手女友Lorraine。基仔出席大會慶功後再去山林道慶祝，Lorraine笑臉迎人到場，基仔自爆與她擁抱同歡。當眾人以為基仔會公開與Lorraine的戀情時，他卻表示不會趁高興而結婚。
古巨基前晚於《十大勁歌金曲頒獎典禮》勇奪最受歡迎男歌星獎，等了14年的基仔於台上公開多謝緋聞助手女友Lorraine。於慶功宴上，基仔雙眼已哭至又紅又腫，他表示有唞不過氣的感覺，他說：「個腦諗唔到嘢，望住個獎頂唔順係咁喊。」
「支持我咁多年」
問基仔是否效法許志安的「廚房宣言」？他說：「14年前攞新人獎欠佢一個多謝，當年佢半講笑叫我攞男歌手獎先多謝番佢，今日終於有機會。」問基仔是否公開Lorraine的女友身份？他說：「助手嚟㗎喎，一個好密切嘅助手，支持我咁多年，最大支持我。」
基仔表示領獎後未有見過Lorraine，見面時會與對方來一個擁抱。記者繼續追問基仔會否宣佈結婚，他反問：「點解呀？我咁激動係等十幾年先可以多謝佢。」由於基仔為無綫主持《係咪小兒科》，故被指換獎，他說：「每個歌手都有幫TVB做嘢，如果係咁簡單，我唔使等14年。」
另外，奪得亞太區最受歡迎男歌星獎的陳奕迅，因未有機會致謝辭而黑面，但他強調不是為此而不快，更加不是失落男歌星獎而失望，他說：「因為把聲拆而唔開心，唔夠時間講嘢咪唱歌。」陳奕迅表示戥基仔及楊千嬅感到高興，他說：「千嬅攞獎特別激動，佢辛苦咗咁多年。雖然基仔經歷嘅嘢我冇經歷過，都好戥佢開心。」現場見基仔與陳奕迅密密斟。李克勤也衷心恭喜一眾得獎歌手，他覺得賽果很合理，不過他以趕返家餵奶為由，逗留一會便離開。
基仔之後到山林道慶祝，滿帶酒意的黃栢高首先到達，他舉高手指儍笑並攬着在場記者。隨後基仔到場，5分鐘後，Lorraine由女友人陪同下到達，她笑意盈盈步入電梯，後來基仔與小肥、RubberBand到門前接受訪問，問基仔對Lorraine有何表示，他說：「同佢擁抱，個個同事都有擁抱。」他又一臉凝重指有事宣佈，正當大家以為他宣佈婚訊時，怎料他說：「希望大家支持小肥同RubberBand。」
Lorraine笑而不語
直至凌晨4時，Lorraine離開時被問到是否感情明朗化及有否打算結婚，她笑而不答。5分鐘後，基仔接着離開，問他有否計劃結婚？他說：「嚟緊籌備Vivian（周慧敏）婚禮。」再問他會否趁高興與Vivian一同舉行婚禮？他說：「結婚我唔會趁高興。」之後便乘車返回寓所。
採訪：胡比、駱華齡
攝影：娛樂突發組、陳順禎、仇志德
