金融海嘯下百業難捱，內地論壇因為一篇「2009鄭州職位危機排行榜」，就好似十大預言咁，引起好多網民回應，因為榜上嘅職業好普遍，搞到啲市民都好擔心自己份工唔穩陣，人心惶惶，報章都特別報道咗呢件事。
榜上八類最易被裁員嘅職業，榜首係地產代理，其次係汽車經紀，大家覺唔覺得，話係香港甚至美國嘅排行榜，都一樣啱喎！
據《鄭州晚報》報道，個調查係訪問咗鄭州2300個市民，又搵過專家研討。不過為免嚇怕人，報道都搵番個專家嚟安撫大家，該報引述鄭州大學升達經貿管理學院一名教授，叫大家咪迷信排行榜喎。咁又係，睇吓內地富豪榜咁吖，唔少富豪榮登榜上冇耐，好快就跌出榜就知啦。
雖則鄭州只係中國其中一個城市，但家陣世界大同，從榜上有名嘅行業中，都可以話係一眾內地城市嘅縮影，都有參考價值。