今次係我求大俠09年首次同大家見面，喺度補祝各位新年快樂。新年第一炮講番啲懷舊嘢，就係加盟巴甲哥連泰斯冇耐嘅前巴西球星朗拿度。佢日前操練時樣樣包尾，變咗隻蝸牛，搞到隊友同支持者好緊張。
跑圈衝刺包尾
話說上周五操練，「肥哨」朗拿度寒住背、扯住「豪華臀」，成隻蝸牛咁跑圈，有興趣可看 http://www.sportmediaset.it/calcio/articoli/articolo19376.shtml。鏡頭所見，隊友急急腳一圈又一圈，點知鏡頭成日有4、5秒唔見人，然後「扯晒蝦」嘅肥哨先入到鏡頭。好彩現場球迷大嗌：「加油啊！朗拿度！你得嘅！」肥哨先順利完成。
之後衝刺跑先攞肥哨條老命。佢衝幾輪就面紅紅、發軟蹄，事後班隊友神態自若，惟獨肥哨一屁股坐落水箱度，部份隊友即投以怪異目光。操練後，體能教練奧利維拉向記者講明，1月17日熱身賽對小保加唔使預肥哨，因為佢仲要5個禮拜先操弗落場比賽。
講真，肥哨副身形好難恢復比賽狀態，記得佢去年5月承認超重8公斤（理想體重為87公斤），到上個禮拜都仲係超重6公斤，即係8個月減得兩公斤！減肥講恒心同意志力，佢連減肥都失敗，跑圈又包尾，點可能5個禮拜後就出場呢？
最慘係哥連泰斯唔敢迫得肥哨太緊要，因為佢膝頭哥脆過蝸牛殼。奧利維拉話：「最緊要唔好令佢左膝舊患復發，狀態可以慢慢操，我哋會每日check住佢嘅狀況。」佢又呼籲傳媒要正面報道肥哨，唔好畀佢太大壓力，否則會毀咗一代巨星。
哥連泰斯梗係當正肥哨係熊貓咁養啦！只要佢一日在陣，球會就可以繼續發財；好似肥哨未婚妻平安夜生女，會方就推出朗拿度嬰兒套裝。所以，肥哨變蝸牛唔緊要，最緊要招到財呀嘛！