「商品大王」羅杰斯向來語出驚人，仲係多產作家，07年寫完《ABullinChina（中國牛市）》後，舊年再有新作，《AGifttoMyChildren（給寶貝女兒的12封信）》，上個禮拜佢嚟咗香港，同華華講今年會暫時封筆唔出書，會撥更多時間湊女。𠵱家佢最期待嘅，係大女即將為幼稚園做畢業演講，而且會用普通話誦讀。
今年5歲嘅大女Happy，出世冇耐，就有老師負責教「煲冬瓜」，商品大王仲話，只准老師用普通話同女兒溝通，日子有功，大女𠵱家已經可以講到一口流利普通話。
自己唔學煲冬瓜
當然，羅杰斯唔會忽視英文嘅重要，平時喺屋企，當然會同愛女以英語溝通，喺學校亦有專人教授英文。佢好自豪咁講，中文同英文同樣係阿女嘅母語。
至於9個月大嘅千金Bee，雖然仲係牙牙學語，但已識聽、識講幾個漢字。華華問這位廿四孝老竇會唔會一齊學，佢耍手擰頭話自己過咗最佳學習期，反而兩個寶貝女學得快、講得好，等佢哋學多幾年，做佢貼身專業繙譯好過，佢重講笑咁講，到時可能連請繙譯都慳埋。
幸運只啱有準備的人
睇好中國市場嘅羅杰斯，反覆強調未來二十年係中國世界，佢仲提醒華華，Luckygoestopreparedmind.（幸運只啱有準備的人）。佢舊年喺香港狂掃H股，表明唔會賣，要留畀兩位千金當禮物，不過作為一個好家長，佢率先為子女做好準備、加強競爭力，就係要學好「煲冬瓜」，各位家長，知道點做啦！
李華華
mailto:[email protected]