明天會更好，你當歌仔唱，明年會更壞，你未敢當耳邊風。霎眼就到這個更壞的明年，從很壞很壞到更壞更壞，其實只差些少，五十步都冇。這樣想，更壞都照樣能鯁下去，鯁壞應該冇問題，只要不鯁住半天吊半死不活又行錯去明愛醫院就得。
而坐艇，我講過了，根本不值得呼天搶地。還有得坐，有得留低，還神都來不及了。艇仔易跳船，比大郵輪靈活，這種時勢，無謂舢舨充炮艇。坐住艇仔食碗粥，是人生難得的逆流風景。艇仔既小，索馬里海盜唔會吼，這樣反而趨吉避兇，必有後福。固然，接大信封的確認難受，但諗深一層，冇咗份工，又唔係冇咗條命。工可以轉，搵過；命仔永遠冇空缺，上帝不會落招聘版廣告。你搵命博卻被炒，well，再博多幾鋪又何妨，命硬，使撼頭埋牆嗎？
經濟逆轉，你女友走了，恭喜，問心講你根本唔想做娶周慧敏的倪震。老婆走佬更佳，明刀明槍追城大校花吧。老闆走數最衰，你買定巫毒娃娃狂拮發洩好了。今年驚蟄的鵝頸橋，熱鬧了。