黎耀祥戲路甚廣，無論嚴肅、搞笑角色都應付自如，但卻自謙本性內向，是個傳統嚴肅的爸爸。基因異變，11歲獨子正橋性格十分外向，說話風趣不古板，看來一點都不像經過嚴肅家規的薰陶。問到他的教育宗旨，見解也很獨特，就是「重原則又隨意」。
記者：林佩婷
攝影：陳盛臣
重原則又隨意
原則跟隨意是兩個完全相反的詞語，用來教仔看似好矛盾，但黎耀祥話完全沒衝突。「身為父親，我有責任教識佢某啲客觀原則嘅重要性。好似對人一定要有禮貌、要識得珍惜自己擁有嘅嘢、唔可以浪費食物等等。至於基本原則以外，我會認為每個人都有自己個性，互相不必為對方改變，唔可以因為自己係爸爸就係咁逼個仔，所以大部份時間我都會由佢選擇。」
拒絕一人遊戲
工作雖忙，但黎耀祥餘下時間必畀晒仔仔。「一得閒我就同佢打波、踩單車、捉棋等集體活動。由細到大我都唔畀佢成日打機，唔係怕佢沉迷，而係打機只係一人遊戲，無同人溝通。所以細個就無買遊戲機，甚至食飯都熄電視，等一家人有傾偈嘅機會。」難怪黎耀祥話這十年來最成功的，不是甚麼最佳乜乜獎，而是培育到親切關係，「仔仔錫父母，又鍾意返屋企、參加家族聚會。我成日覺得鍾意返屋企嘅人唔會壞得去邊，所以有啲嘢佢想做嘅話，對人無害嘅，我都會由佢試。」
快樂童年棄興趣班
說到學習，還是由孩子自由選擇嗎？原來正橋除公文式、游水及課後補習外，再沒其他興趣班，已五年級快升中了，難道不怕蝕底？「童年生活應該要快樂，過咗就無。記得佢細個我哋要佢學琴，太太想佢多練有時會話佢，最後令兩個人都唔開心。我覺得音樂應該令人開心，既然做唔到呢個效果，不如唔好學，部新琴跟住就以3價錢賣番出去。」問仔仔記唔記得呢件事，他說：「嗰陣行街覺得新奇，可能咁令媽咪錯覺我有興趣。後嚟媽咪越叫我練琴就越唔想彈。」媽咪Julia回話：「當時想佢一朝成材，記得有次佢彈得唔好，我仲叫佢行出門口！𠵱家諗番轉頭當時應該放鬆啲。後嚟老公同我講正橋學得唔開心，最終無學反而全家開心番晒。」
傳統學校無壓力
既然想仔仔有個快樂童年，為甚麼棄國際學校而選傳統名校？「每樣嘢都有正反兩面，壓力亦可以變成推動力。傳統學校某啲限制係好，等小朋友發展之餘又有啲規範。若果仔仔真係讀得唔開心，到時先轉都唔遲。但若果一早自由慣，就唔易返轉頭。」太太Julia亦十分認同：「正橋成績中上，自三年級後，我哋就無特別關注佢成績。記得有次水運會，見佢赤裸上身着拖鞋坐喺課室同人捉棋，所謂傳統名校，一樣好自由隨意，仔仔直情當係第二個家。」講到底，黎耀祥話唔開心幾叻都無用，讓他選擇，就寧願正橋做個開心但唔叻的人。
