民主黨主席仁哥噚日同副主席卿姐拍住上,出席多個同志與婦女團體參加嘅研討會,會上難免因黃成智反對家庭暴力條例修訂備受圍攻,雙方更就條例名出現爭拗,泛民話為爭取更多議員支持,可以考慮改名叫「家居暴力條例」,同志方面就唔少人企硬唔肯改名。同場嘅公民黨張超雄睇到咁,就即場拋出個「西米芒果布甸」論,試圖平息大家嘅怒火。
張超雄話,大家咁拗法,不如將條例改名做「家庭及家居暴力條例」,好似有人鍾意食西米,有人鍾意食芒果布甸,其實撈埋就最好味。在場唔少人聽到都笑咗出嚟,卿姐亦話鍾意食西米芒果布甸,但呢個甜品搞唔搞到出嚟,睇嚟仲要睇埋政府點煮法。