記唔記得敏妮曾經提過視光師？佢本來諗住舊年買樓結婚，當時樓市開始跌，敏妮叫佢睇定啲先。前幾日敏妮帶媽咪去佢度驗眼，視光師話好彩仲未買樓，因為佢睇中嗰層，由叫價三百幾萬，跌到約280萬，佢問敏妮：「仲會唔會跌呢？但我又驚貪字得個貧，想佢再跌啲點知升番，錯過撈底好時機。」
何妨睇定啲至買
敏妮唔敢講會唔會錯過撈底時機，但舊年9月全球經歷金融海嘯，各地政府陸續推出救市措施。食咗特效藥可以即刻制止住病情，但都要調理一排先可以慢慢復元。用番喺投資市場，假設家陣災難算係平定，善後嘅工夫唔係一時三刻就可以見效，既然經濟需要時間復元，即使要等好景重臨，應該仲有一段時間，咁又使乜咁快做決定呢？
講開買樓，前幾日喺將軍澳坐的士經過某個樓盤時，位司機叔叔同敏妮講：「小姐，你話呢個盤賣唔賣得吖嗱，起正喺堆填區。」敏妮記得嗰個樓盤舊年喺樓市高位推出，賣得好好。司機叔叔繼續講：「我都車過個代理入嚟，佢喺電話同個客講，話幫佢留咗邊層邊層，如果要再預留，就要趁快。睇怕呢個盤都係炒家居多！」
司機叔叔又話：「之前我載過另一個客，佢應該都係想買樓，佢要我兜咗個圈，又落車行咗一陣，喺車度左睇右睇本售樓書。之後佢又叫我車佢去同區另一個樓盤，兜咗個圈，落車行咗一陣。我諗佢係真正用家，買樓真係要睇吓個環境先得嘅，靠個電話就話買，邊得㗎！」
切記親自做功課
講真喺好市嘅時候，嗰位用電話遙控買樓嘅投資者，可能好快就賺到盤滿缽滿，當然遇着家陣個市，佢亦有可能因沽唔切貨而坐艇。不過，另外一位置業人士，親自去感受個樓盤嘅優缺點，無論最後有冇買，敏妮同司機叔叔都相信，佢做咗咁多功課，投資贏面點計都應該唔細。
溫敏妮
http://wanmanli.com/blogs/