早幾日，華華喺一個酒會見到冠軍科技（092）主席簡文樂（Paul），講起本港經濟，佢話香港唔係咁差，只係大家冇信心，所以佢哋做交易會慢咗，一單還一單；啲客找數亦慢咗，因為錢梗係擺喺自己度好啲，但佢話都係多年客仔，最多慢咗啲找數，冇話唔找。
褲王只敢估中國經濟表現
大家咁謹慎行事，就好似啲水以前好清，大家睇得明白，但家陣就好濁，大家睇唔清，所以冇人敢潛水。佢又妙喻中國，話好似載住13億人口嘅航空母艦。周邊呢？一係反晒艇，一係搭沉船。咁香港有中國呢隻航空母艦載住，就唔怕沉。
同場華華仲見到褲王楊釗，佢話旗下公司旭日（393）嘅業務，佔超過一半喺中國市場，中國明年經濟增長預期5至8%，起碼都叫做有個可靠嘅參考數字，但其他地方因為資料不足，以至美國政府救市後，經濟環境會點，大家真係估都唔敢估喎！