關心妍（Jade）踏入09年不久便發生瘀爆事件，前晚在「2008年度勁歌金曲頒獎典禮」中以為自己得獎，竟撲上台搶關菊英的獎項，𤓓爆全場。Jade攞錯獎片段即時被網友放上Youtube，直至昨晚點擊率高逾30萬次，熱爆全城。Jade昨午出席活動時直言自己𤓓爆，更自嘲有幻覺和幻聽。
無綫「2008年度勁歌金曲頒獎典禮」前晚舉行，整晚高潮莫過於關心妍攞錯獎出醜一幕，當司儀曾志偉宣佈傑出表現獎金獎得主是關菊英時，Jade不知何解竟以為自己得獎，突然從後殺出，先攬關菊英再在志偉手上攞獎；當發現自己搞錯時，即一臉尷尬地返回座位，可謂瘀爆。
家人好擔心
有網友當晚率先把Jade攞錯獎的片段放上Youtube播放，直至昨晚其中一條普通版的點擊率高達17萬，再加上其他不同版本的片段，累積點擊率已逾30萬瀏覽人次，不少心水清網民指看到坐在後面的林敏驄講「儍婆」的口形，陳奕迅則做出聽不清楚的手勢，林峯則掩嘴狂笑。
𤓓爆的Jade昨日如常到大埔出席港台「職安健樂安居音樂會」，她甫見記者即說：「即管笑，我自己朝早5點幾都笑醒，但媽咪同家人就好擔心，佢哋睇到都呆咗，我未敢面對去睇，我可能有幻聽同幻覺，我都覺得好瘀。」
提到被林敏驄取笑為儍婆，Jade表示不介意，因林敏驄還讚她唱得好。至於一直傳和Jade不和的周麗淇昨日同場出現，問她有沒有看Jade攞錯獎片段？她說：「我冇睇，可能佢緊張先出錯，大家唔好笑佢。」
Jade前晚也有出席勁歌慶功宴，並以橙汁向關菊英道歉，她解釋出醜原因說：「係因為現場迴音大，聽錯咗衝咗出去，真係好尷尬，我同菊姐講咗唔好意思，阻住佢攞獎，我都覺得自己好𤓓。」關菊英則說：「我都知佢好尷尬，佢都同我講話係聽錯。」
網誌上認錯
關心妍昨日凌晨4時更新網誌，指這是「09年第一瘀事」，並謂：「2009年一開始就搞啲咁嘅嘢，我知錯了……真係好瘀……我明白會有人嘲笑的，我自己看完都笑。我2009年第一件事就係一定要買個助聽器先……人生真係要有一啲難忘嘅事，我諗呢件會係最後一件……估唔到自己咁白癡都得。」她又謂這個金曲獎最難忘，並會為這事負責。
採訪：王連連、胡比、駱華齡
攝影：陳順禎、仇志德、陳俊強