呢個政府，有好多嘢俾人濫用，除咗999熱線同綜援之外，近期仲有一樣，但就唔係人人用得，只限警察，皆因呢樣嘢叫做警權。請願人士被控襲警、被捕人士被剝光豬搜身，最近仲恐怖到喺警署發生風化案，唔怪得過去一年警隊民望大插水。最近有網民想拍輯《防止警權過大》短片，但申請喺片中着警察制服時卻遭警方否決。警方唔想形象惡化，但就被人鬧妨礙創作自由。
網民着制服拍片被拒
喺香港要着警察制服拍嘢，要先向警察公共關係科（PPRB）申請。有位網民喺網上嘅「獨立媒體」披露，佢為咗拍呢套短片，好認真咁向PPRB提交故事大綱，同埋演員着住仿警察制服嘅造型照；其中一個劇本係以保育人士謝德文早前喺差館俾警察話佢襲警單案為藍本。結果警方睇完個劇本，就回覆佢話：「情節涉及穿着類似警察制服的演員毆打市民的戲份。本處認為此等行為絕對有損香港警務處之聲譽」，唔理係咪真人真事，否決咗個申請。
呢位網民先後提交咗三個劇本，不過警方先後以「使用的制服不符合警隊制服標準」、「劇本內容未能夠展示警隊的正面形象」等理由唔批准開鏡。如果拍正面嘢先可以攞正牌着警察制服，咁同做樣板戲有乜分別？幾年前叫好叫座嘅港產片《無間道》都曾經因為情節問題，一度被警方拒絕戲中演員着警服拍攝。況且今次位網民拍攝嘅內容都好寫實吓，連記錄事件真相都唔畀，似乎過份啲喎。
情節要展示正面形象
八方噚日向警方查詢呢件事，警方話的確係接到一位程先生申請演員着警服拍攝，由於情節未能展示警察正面形象等問題，一直冇批。佢哋又補充，除咗形象問題，審批時仲會考慮到拍攝工作對道路、附近居民有冇影響等等。
不過，呢位網民仲未死心，曾經為呢件事，打電話約見立法會體育、演藝、文化及出版界議員霍震霆。不過霍公子代表咁多界別咁忙，個網民等咗成兩個月，都冇人回覆佢。呢位網民惟有將政府早排拍攝嘅一段防止濫用綜援嘅宣傳片，改編成《防止濫用警權》短片，效果都幾搞笑，但就唔知會唔會被政府話侵犯版權喇。
mailto:[email protected]