民主黨黃成智近日因家暴條例成為焦點，舊年重返議會後，忽然惹麻煩上身，唔知有冇懷念在野日子？黃成智噚日接受電台訪問，稱04年落選後冇全職工作，全靠朋友安排短期工作搵兩餐，「今個星期都唔知下個星期有幾多收入」，幾乎彈盡糧絕，「太太要日日數住屋企有幾多罐頭，幾多公仔麵。」
捱咗幾年，去年終於苦盡甘來當選，不過佢話回顧過去四年，覺得落選係神嘅恩典。因為嗰幾年佢轉型做住家男人，好多時間陪伴兒子，令父子感情甚好，又多咗陪老婆，太太腎病都冇嚴重惡化，一家人齊齊整整，若非落選，就冇可能享受呢啲家庭樂，𠵱家工作纏身，冇晒呢啲樂趣了。