娛樂圈真係有好多躁狂症嘅人，好似「吹水強人」就係一個例子，關仁早兩晚就同一位早前有份出席康城影帝佛國婚禮嘅明星一齊食飯，佢就話親眼見到吹水強人嘅躁狂行為有幾失禮，事緣因為佢同女伴「雲吞」、囡囡一齊參加影帝婚禮，點知到達佛國後，所有賓客坐車去到酒店大堂辦理登記入住手續時，吹水強人發現自己本護照唔見咗，佢即刻大發雷霆，係咁鬧人，唔理係邊個，總之行埋去就俾佢做箭靶。
雲吞就最慘，俾吹水強人鬧得最甘，但完全冇駁嘴，仲要為吹水強人亂咁鬧人向人道歉，最慘係囡囡睇到此情此景，竟然冇眼睇話：「Uncle成日係咁㗎啦！真係討厭。」吹水強人後嚟終於發現本護照，原來係佢自己漏咗喺架旅遊巴士度，自己大意，但就係咁鬧人，真係唔啱。
Textby關仁