時光倒流　睇27歲高清劉華

經典場面，永遠難忘，尤其劉華同張曼玉喺《旺角卡門》中電話亭內，長達30秒嘅激咀一幕，今時今日翻睇，仍可謂電影界金童玉女代表作！今個禮拜新碟一片靜，但係呢齣剛踏入第20年嘅著名電影卻重新推出Blu-ray版，全高清1080p畫面下，究竟當年27歲嘅劉華有幾靚仔？睇怕Fans實唔會錯過。

記者、攝影：陳國輝

王家衞處女作

唔講唔知，《旺角卡門》原來喺1988年上映，至今剛滿20年。論經典場面，唔單止男女主角激吻一幕，仲有旺角舊唐樓取景以及勁Hea煲煙仔等超級大特寫，除咗一個「型」字，都唔知搵乜嚟形容！再講，王家衞電影一向好舊香港Feel，加上《旺角卡門》屬於其處女作，既然難得推出1080p全高清版，身為王導演粉絲梗係要買番隻收藏啦！不過，今次Blu-ray並未加入當年拍攝花絮，更莫講話導演及演員專訪，至於Bonus宣傳片內只見王導演出現過幾秒，睇番當年嘅佢，外貌變化認真大！

■經數碼修復，某啲場面依然多Noise。

暗位實色夠標

記得早兩年，唔少舊戲不斷翻出數碼修復DVD，但好壞參半，嚟到最近終於輪到Blu-ray發威！繼前排推出藍光版《緣份》之後，《旺角卡門》亦採用1920×1080全高清解像度，論畫質肯定冇現時新碟嗰種全高清咁靚，但好似夜晚、唐樓內等偏暗場景，除整體有些少偏藍之外，經重新修復後已經減少好多Noise，最難得影像更實淨，色彩層次更豐富，比起當年矇查查嘅畫面，當堂Sharp到痹！

■Bonus王家衞！竟然唔戴黑超，不過睇落無咁有型喎。

聲效誇張地假

20年前玩2.0聲效已經算係High-end，到今時今日採用7.1，究竟表現又係點？雖然《旺角卡門》未玩到7.1咁盡，但如果選用廣東話版，你仲可以揀DTS-HDMA5.1或DolbyDigital5.1；普通話版則完全被忽略，僅支援DolbyStereo2.0，效果絕對差得遠。印象最深刻係每逢到劈友劇情，刀來刀往或爆樽嗰時，SoundEffect特別明顯，甚至誇到有啲假；而一般人聲對話，背景噪音已減到幾乎聽唔到，整體上聽得好舒服。