我成日覺得喺伊朗做潮童都幾迷惘，無K唱、無Pub蒲，連想去齡場碌齡，才發現齡場原來從未開業！唔通伊朗無潮童？錯，每逢周末，伊朗潮童都有例牌蒲點，唔係旺角而係郊野公園，可免費做Gym、食水煙，仲可在樹蔭下卿卿我我！最緊要係，伊朗公園無鏹水狂徒，比旺角更安全！
記者、攝影：馮冠芝
鳴謝：美麗華旅遊、IranCulturalHeritage,HandicraftsAndTourismOrganization（ICHTO）
露天舒X堡
作為伊朗首都，德黑蘭該有的，還是無！無K唱無齡碌無吧隊酒，那美好的周末，該何去何從？「去郊外公園吧！」建議出自22歲ITlook青年！咁健康？半信半疑前往HaghaniPark，穿過停車場與楓葉林，躍進眼簾，竟是室外版舒X堡健身中心！我無眼花，SkyWalk、擴胸練習器、腳部推舉器都有！為了讓市民可正常健康地發洩精力，德黑蘭公園的健身設施，齊全得像健身室，室外gymroom除可邊享凉風邊運動外，最重要係免費！難怪伊朗一眾美女，即使頭戴頭巾，身穿及膝大褸，還是在器械上揮熱汗！果然，天下女人皆愛美嘛！
自行生火燒茶
穿過「Gym區」，攀過小山坡，一群群潮童坐在公園特設的小石台上，邊用手機播着波斯rap邊野餐！鼓起勇氣走近其中一群潮童搭訕，料不到他們極友善，當中型男Rezaee一見我們，二話不說移出石台位置讓我們坐，又請我們吃朱古力，國籍不同言語不通，仍可樂也融融坐埋一枱。Rezaee除了請我們抽水煙外，還見他在荒山野嶺間，熟練地以石堆爐，燒炭生火，好以火燒茶，為我們幾個客人送上熱飲！
10蚊煲印度劉華
除了郊遊，伊朗潮童終有一項我們熟悉的嗜好：買碟睇戲！無論波斯rap、電子樂，或是local電影，價錢只是約港幣10元！嫌伊朗片太陌生？尚有Bollywood劉華的愛情片，西片《007》都有！只係當邦女郎着三點式時，畫面會「自行調整」成closeup女角的面，或是一個方形黑影會忽然籠罩女角下身！忽發奇想：如果日本A級動作片經伊朗自行調整後，亁脆改名成《黑盒碰撞記》吧！忽然覺得在香港做潮童，真幸福。
楚河漢界
在伊朗做潮童難，做女人更難！女人要布巾遮頭，大褸蓋股，搭巴士，要謹記男前女後！喺伊朗搭巴士，車中間會有條隱形楚河漢界，男女上車後各自會壁壘分明！如果坐錯「男界」點收科？本人親身經歷，上巴士時唔小心「踩界」，幾十道目光立刻由四方八面射過來，直到你企回「女界」為止！坐地鐵，情況無咁慘，有男女共坐列車，但亦有「WomenOnly」的一卡！一句講晒，坐交通工具都要好似上廁所咁，分男界女界！
出門提一提
簽證：持特區護照及BNO均須簽證。
查詢：28458002（伊朗領事館）
旅行團：伊朗、杜拜8天豪華團（GIDC08/GIDD08/GIDS08），團費$12,499起，行程包括伊斯法罕、卡尚、德黑蘭、設拉子及杜拜Atlantis,ThePalm。查詢：82002299（美麗華旅遊）
貨幣：1港元約兌1,279伊朗Rials
電壓：220V，兩圓腳插頭
下周伊朗德黑蘭多雲，-3至9oC
