日本男星成宮寬貴今年有新片《LALAPIPO》同《DROP》輪流上映，佢喺《LALAPIPO》扮演專冧女仔賣淫嘅姑爺仔。日前成宮忙裏偷閒到巴西旅行兼倒數，但佢前日喺網誌入面，自爆喺當地遇到小偷，偷咗佢裝住護照同手提電話嘅手袋，搞到要去大使館補領護照。另外，成宮自從去年嚟香港拍港台劇集《幸福的味道》之後就愛上咗香港，今個月16號仲會親自帶團同fans嚟香港旅行。