禍不單行，海洋公園今年元旦日發生海獅咬人事件，噚日又出事，公佈再多一條國寶中華鱘死亡，大半年內先後有三條國寶喪命，真係枉海洋公園以海洋生物保育專家自居。國家送出十條中華鱘，養吓死一條，養吓又多條反肚，𠵱家仲有幾條病咗，恐怕不出幾個月就……八方真係不敢想像。
上年海洋公園為迎接中華鱘，將鯊魚館改建為中華鱘館供養國寶，中華鱘數目越來越少，可見將來中華鱘館隨時得番個殼，死晒啲魚餘下個館，既然已花錢將個館改建，又大興土木變回鯊魚館有浪費之嫌，八方建議海洋公園即時制訂可持續發展方案，一俟個館吉咗，就改為「中華鱘紀念館」，只係加多兩個字，輕易而舉。
「中華鱘紀念館」一定要放置已故中華鱘標本供市民憑弔，同時播放佢哋生前暢泳片段，音容宛在，相信參觀者無不動容。海洋公園自詡一直致力寓教育及保育於娛樂，所以館內原有介紹中華鱘嘅資料，一樣都不能少，兼且要補充中華鱘坎坷一生遭遇，事關若非有人知少少扮代表，唔識養又充專家，貿然送幾條中華鱘嚟香港冲喜，佢哋未必客死異鄉，呢段血的歷史，淚的教訓，必須完整紀錄，等下一代知道國寶捐軀壯烈事迹。
盛智文入局可能冇事
第一條中華鱘被海狼咬死後，八方已嚴正要求煲呔親自抓緊死因調查，否則不能向國家交代，並即時將中華鱘遷移至禮賓府錦鯉池，由養魚專家，即係煲呔本人親自打理，可惜煲呔充耳不聞，點解煲呔置國寶安危於不顧呢？
陰謀論家指，政圈盛傳煲呔想延攬海洋公園主席盛智文入行會，盛智文因此放棄加拿大籍入籍中國，詎料阿爺對洋人有戒心堅拒放行，「咁蹺」海洋公園近期又怪事頻生，大熊貓發狂、海獅咬人，中華鱘接二連三冇命，如果盡快談妥行會新人事任命，係咪會天下太平呢？煲呔話港人要「保命」、「保本」、「保工」、「保信心」捱過金融風暴，點知連國寶條命都保唔住。
mailto:[email protected]