【本報訊】金融海嘯襲擊，危中有機，藝人逆巿開店，實力加上明星效應事半功倍。前港姐謝寧於聖誕前在九龍城開設「曲奇四重奏」餅店，以健康作賣點，旋即「日日做到冇停手」，下一步在春節前進軍高級超巿賣餅；苦守兩年的藝人谷祖琳，趁金融海嘯租金回落，聖誕前選址大坑開糖水店「小甜谷」，迄今晚晚高朋滿座，已計劃開分店。 記者：蔡朗清、蔡元貴
謝寧製曲奇 唔靠油香賣健康
位於九龍城的謝寧曲奇餅店，逆巿開業有多受歡迎？記者閉門採訪，也有顧客興冲冲拍門要入門買曲奇，受歡迎程度可見一斑。其實故事在兩星期前已在網上流傳，前港姐謝寧與三位好朋友合資逾百萬元，創立一個本地曲奇品牌。
三位股東加上一位來自五星級酒店的總廚做顧問，品牌便取名「曲奇四重奏」。謝寧早有整餅經驗，在City'super開班教人製月餅，明星效應，反應不俗。然而「曲奇四重奏」沒有以謝寧做生招牌，她說：「我唔信明星效應嘅，好多食肆掛蔡瀾張相喺度，你去一次覺得唔好食，就唔會再去。
歡迎顧客退回「吉」罐
曲奇四重奏每罐雜錦曲奇餅售價118元，共有九款曲奇；蝴蝶酥則售68元，賣點是選用有機小麥粉。謝寧說，她們要推翻曲奇餅食肥人的不良傳統，她賣的曲奇不夠人家的香，謝寧卻引以為榮：「出面啲曲奇咁香，係因為落得太多油，好唔健康。」她的品牌強調環保，曲奇餅不會用紙隔開，而且歡迎顧客食用後退回「吉」罐。
淡市開張，股東之一的黃志煒解釋：「間舖籌備咗成年，即使金融海嘯嚟到，都冇影響我哋嘅計劃。」三位股東本來都有正職在身，曲奇生意是錦上添花：「我哋冇諗過賺大錢，只求一年後收支平衡。」但生意出奇好，「有啲要落訂」。
曲奇四重奏下一步會主力搶佔高檔市場，期望在春節前可以在高級超市發售。
曲奇四重奏小檔案
產品及定價：雜錦曲奇，每罐118元 蝴蝶酥，每罐68元
特色：全手工製作，選用有機小麥粉、法國及新西蘭牛油
地址：九龍城福佬村道58號地下
查詢電話：23822817
資料來源：曲奇四重奏
谷祖琳甜品 無秘方一味用心
大坑街坊孫婆婆經過糖水店「小甜谷」，剛巧走路走得有點倦，便坐下叫了一碗紅豆沙，一啖入口，大讚紅豆沙夠綿夠火喉、陳皮齒頰留香，「呢間舖係谷祖琳開嘅，咪嚟試吓，紅豆沙幾好。下次會帶埋個朋友嚟幫趁。呢度（書館街）一向都欠缺咗間糖水店。」
藝人谷祖琳除愛拍戲外，便最愛吃，愛得自小學做蛋糕、麵包，跟日本師傅學料理、甜品，過去兩年更計劃開設食肆，但舖租太貴未能成事，豈料經濟大逆轉反讓她找到機會開設糖水店，「金融海嘯前問過九龍城、中環嘅舖租，幾百呎地方月租約七萬元，根本冇得做。相反，𠵱家呢度月租兩萬幾。
用貴價北海道牛乳
谷祖琳並非盲目投資，睇準大坑食肆漸多，慢慢形成「中式Soho區」，又見當區糖水店不多，自己最有信心是炮製糖水，投資約百萬元選址書館街設糖水店。
谷祖琳強調，炮製糖水沒有秘方，最重要用心及選料。她舉例說，紅豆沙一定要煲得夠綿，不能馬虎，配料用最好的新會15年陳皮。牛乳燉蛋白等甜品則用她自小愛吃，成本貴兩、三倍的北海道牛乳，「就算係造溏心蛋，都花咗幾日，要先掌握水溫同烚蛋時間。」
谷祖琳不諱言逆巿開店，明星效應也幫了一把，「呢度位置係有啲遠，但係有唔少人慕名揸車嚟呢度食糖水。」
由聖誕前開業至今，晚晚高朋滿坐，谷祖琳現已計劃擴張開分店。
小甜谷小檔案
產品及定價：特濃牛乳燉蛋白、濃滑杏仁豆花等，售23元；15年陳皮紅豆沙，售16元；冰花雪耳燉木瓜、湘蓮芝麻糊等，售18元
特色：採用北海道牛乳、15年陳皮、生磨芝麻合桃等
地址：大坑書館街10-11B地下
查詢：28826133
資料來源：小甜谷