香港人視東京為故鄉，築地魚市場更係返鄉下必遊之地，點知築地上個月突然宣佈，至1月17日都唔准遊客參觀影相，以免妨礙市場運作，令好多遊客掃興而回。
築地忽然下逐客令，八方聽聞可能同壽司舖老闆鄭威濤Ricky生有關。佢舊年高價投得「日本一」，即係每年魚市場首個交易日，場內最貴、最靚嘅吞拿魚王，港、日傳媒都大事報道，據講當地業內人士對由外國人投得「日本一」兼搶盡風頭有啲不快，所以今年就話喺新年期間唔歡迎遊客。
Ricky生話唔清楚點解築地實行新措施，但坦言唔排除舊年投得「日本一」令當地魚商有啲唔高興，更話今年競投可能會遭「圍攻」托價要買貴魚，不過佢話除笨有精，因為喺日本有咗知名度，有魚販認得佢，𠵱家攞貨又快又平。