阿爺嗰代，講求竹門對竹門，唔同Grade好難併埋一齊。買車一樣，老婆會怨你搵到錢卻貪平買架實用七人車，屈就家人；慳家小女人亦會鬧你充豪氣。咁就要睇睇呢兩架二手Estima，豪華抵玩都有，絕對門當戶對。
記者：徐影龍
攝影：陳陶鈞
Model：Eriko@StageModels
豪裝！七人車得四個位
對老闆級或打工皇帝嚟講，揀車唔係先睇有幾多豪華設備，而係會親身實試個乘坐感，夠舒服聚財先考慮其他嘢。呢架04年Estima，行得五千幾公里，夠新夠後生唔係特別之處，最與別不同係將一架七人車，搖身變成四人車，中後排Combine成兩個超級老細位，闊落到姚明都可伸直腳鬆一鬆，我試坐過，同司機哥哥講嘢真係要嗌先聽到，證明車廂空間大得有幾誇張。拉埋窗簾，和暖陽光透入車內，估唔到Estima寧靜舒服得像一間流動睡房，等於大家都住一千呎單位，我就五代同堂逼埋一堆，你就得兩公婆加隻狗，仲可以四圍走。
呢架咁特別嘅版本由日本豐田原廠製造，名為MobileOffice，全港得一架，所有豪華裝備都係出廠已經有，包括越嚟越多七人車都有嘅電動趟門，上落毋須再跟車門角力，最緊要係有障礙感應，唔怕夾親手。其他豪裝仲有頭頂LCD、雙門雪櫃、錄影機、DVD機，餐枱同化妝枱等，應有盡有。豪版Estima叫價近40萬，以享受嚟計唔算貴，仲用埋Hybrid混能偈，2.4L有3.0L表現，耗油更低至約$1/km，物有所值喇。
a.雙電趟門日益流行，輕輕一拉就開到。
b.將兩排座椅改成得兩個位，闊落度可想而知。
c.頭頂有LCD，腳下有DVD機同雙門雪櫃，Hea成日唔落車都得。
d.出廠已裝配嘅DVD同錄影機，日版制式，睇得唔錄得。
實用！10萬有找
用40萬買架Estima，你可能會嫌太奢侈，又或家中老幼濟濟一堂，根本唔夠坐，都係傳統七人車啱使啲。呢部千禧年出廠嘅Estima，未睇Config同設備，肯定先被其$9.9萬超低割喉價所吸引，十萬有找，對好多人嚟講都唔算大負擔。剛添丁嘅小家庭，車更加要抵玩又實際。以為幾萬蚊貨仔就無好嘢？呢架Estima一樣係電動趟門打孖上，好體貼，當然平地台及中間無阻擋位，直接令第三排乘客出入舒服得多。
全車已裝皮椅，中排頗為闊落，而且一樣有腳墊位，身體挨後再托住雙腳，小睡一會好舒服。手枕位更可翻出一張小枱仔，有兩個杯架，PSP或IceMocha都手到拿來。車行另外安裝埋頭頂LCD，DVD碟機並非放中控台，而係裝喺前排座椅下，方便後邊乘客換碟同Control，具豪嘆特色，而且成220匹馬力，坐足七個人兼擺滿尾廂，一樣有氣有力飆上大斜路。
04年製造及登記/2,400c.c.＋電動馬達/160匹/1手車/行車里數約5,500km/查詢：富利堡（28776700）