民主黨同公民黨噚日各自閉關集思,為今年如何發展黨務度橋。民主黨主席仁哥會後話,今年首要任務係籌款,因為去年大選後,財政元氣大傷,加上要做地區工作備戰下次選舉,估計民主黨未來一兩年經濟上都有重擔,所以4月起會上街賣獎券,又會請人推行月捐計劃,盡量開源。
仁哥又話,民主黨今年會首次考核立法會議員工作表現,check住黨友工作進度,新副主席卿姐係負責呢項工作大熱人選。公民黨方面,噚日有成50幾人開會,訂出三項大計,包括培訓黨員「立足專業,服務市民」,區議員同地區發展者則要「一人一組織」,人人大舉組織居民搞地區活動,呢招農村包圍城市左仔搞足幾十年,公民黨遲學好過唔學。