長假期最後一天你還未決定是否帶孩子去睇那套老鼠卡通戲，我建議你不。老鼠比人類還要階級分明，大耳朵精靈趣致一身亮麗打扮的，討人喜愛到不得了。坑渠老鼠，一比之下，同樣是老鼠，嚇死奄尖公主。老鼠想解釋，我雖然醜但我溫柔兼做錯事肯認，EQ高過高官。但歷來公主和疑似公主的高竇物體唔會講道理。醜鼠給公主的尖叫刺激，潛藏的鬼祟陰暗性格爆發。咦，又唔見大耳仔老鼠會有陰暗面。難道真是醜人多八怪？對，電影還要安排一個豬扒宮女，死蠢兼笨手笨腳，完全唔識翻炒李香琴的奸計或者向局長副局偷師。
老鼠與人通通不惹笑，國王和公主拉長塊面似曾特首，豬扒宮女和她的獄卒老竇圓碌碌似影射唐氏症患者。戲睇到一半，如坐針氈。好彩阿仔跟兩個朋友仔掛住搗亂那盤大碼爆穀，對劇情未上心，不會追問點解公主唔中意坑渠老鼠。牠是不是泛民？係咪親疏有別？阿仔有所不知，老鼠分三等，頭等身光頸靚讀書識字做高級公僕，二等四海浪遊逍遙自在不問政事，三等最低賤只能餐搵餐食等炒魷。不曉得有無阿媽邊睇戲邊向孩子灌輸「你唔溫書，假期後考試肥佬，就會好似三等老鼠咁，驚唔驚先？」這位媽媽個樣好似飲了頭啖老鼠湯當堂嚇瓜那個肥婆皇后。