銀行股遭策略股東沽售之消息最近如雨後春筍，例如中國銀行（3988）境外戰略股東瑞銀已悉售中行股權，滙控（005）大股東之一的中東富商MaanAl-Sanea所持的SingularisHoldings亦在上月中減持「大笨象」股權。最近霎時咁多人沽銀行股，除反映「等錢使」外，亦可能是有關人士睇淡銀行股前景，所以沽得就沽。
私有化概念強
金融海嘯不僅重創銀行股，連帶衍生的後遺症亦令銀行股前景陰霾未散，所以縱使不少銀行股由高位回落不少，但並不等如「可以買得」。不過，擁有內地母公司背景的本地銀行股，例如工銀亞洲（349），星俠認為有留意價值。雖然工銀亞洲一樣因結構性投資工具虧損而要作出撥備，但揀該股而不選其他銀行股，主因係工銀亞洲有被私有化可能。
受過金融海嘯教訓後，散戶對坊間投資產品有一定戒心，故銀行業非利息收入短期大減已成趨勢，銀行要保持盈利能力，要扭盡六壬，簡化營運以減輕成本係其中一招。工商銀行（1398）於07年12月曾出手增持工銀亞洲權益至71%，在業務功能上，私有化當然可令集團減省營運成本，所以工銀亞洲係具備潛在私有化的銀行股之一，可伺機吸納作中長線持有。
方星俠