農夫譚強之前成功以天然方法飼養出低膽固醇的「健味豬」，因為「我啲豬肉已經完美，又賺到錢，無晒挑戰性，仲養嚟做乜？」所以不再養豬，後他轉為養鯇魚。兩年後的今日，鯇魚都長大了，最近便開設一間粥店賣魚粥，標榜健康清淡無添加，而且連豉油都是自己釀造。就憑他對食物的執着，怎能不稱為狂？
記者：吳允冲
攝影：譚盈傑、楊錦文
自養魚無泥味
「我叻就一定叻，全香港得我有，無人做到呢隻魚。邊個可以青山綠水咁養魚？」健味鯇魚只吃米糠、粟米，絕對不吃合成飼料，「啲魚食乜我哋自己食咗會吸收番，我唔想畀人食完，然後個人唔係長壽，而係會快啲死！」譚強特別以龍尾草餵魚，令鯇魚有一陣草香，沒有臭泥臭青味，難怪他那麼牙擦，用來做粥，特別鮮甜；就算是鱔，都要先在甘草水中餓養十日，去除了泥味，脂肪亦較少，所以零舍爽口。除了魚是自養，豬內臟如豬肚、豬心都是自家貨，店內小至豉油、豆漿都是譚強自製，令人不得不佩服他的堅持。
不過他始終不是飲食業出身，粥店才剛開業，食物的煮法還在摸索中，「咁咪有挑戰性囉！」像粥底就比較淡口，亦有人嫌不夠綿，「粥底最少煲四個鐘，又加咗腐竹、皮蛋，最緊要係煲得夠滑、夠綿。」要訣還要訣，要粥底更完美，不單止認叻就OK，還需要努力。
Youarewhatyoueat
「我認為唔健康就唔賣，我嘅要求係我自己擺得落口先俾人食。」強調出品全無味精雞粉，因為食粥都是求清淡，「𠵱家啲人食嘢淨係識點汁，都唔知咩係鮮味！若嫌唔夠味，加啲鹽加啲豉油已經夠。」吃譚強的鯪魚球也別奢望會有蜆芥，「蜆芥唔健康，啲蜆擺咁耐，一定有防腐劑。甜醬我都無，我覺得炒麵俾辣椒醬已經好過份。油炸鬼用萬年油炸，我又唔賣。」強哥，好嘢！有性格。
鮮魚腩粥（$40）
選用的鯇魚不夠兩斤重，肉質嫩中帶爽。
滑雞粥（$45）
用的是新鮮雞，沒鮮雞時寧願不賣。
鮮魚頭粥（$48）
骨多但特別香，是譚強的至愛，尤其鍾意魚雲軟滑的口感。
鱔球粥（$55）
鱔球十分彈牙，連皮都特別煙韌，別處吃不到，貴得有道理。
炸鯪魚球（$40）
特別混了自家製肥臘肉，食落特別甘香。
名人食客唯靈：「我呢啲順德佬覺得個粥底可以稀啲，但係魚片太多骨。」
健味粥（28388358）
地址：銅鑼灣登龍街39號
日賣500碗 酒香魚粥
「健味粥」強調原味清淡，「和味粥」就以惹味著名。他的魚腩經薑汁燒酒爆過，不用再蘸豉油已經很惹味，而且魚肉結實有彈性，咀嚼之下滲出鮮甜味，一點腥味也沒有，全因採用順德鯇魚，一條至少六斤重；老闆一日入貨四次，食物流量快不會隔夜，魚肉新鮮，才不會又腥又「削」。魚肉了得，粥底也講究，以米混合大地魚粉、亁瑤柱、瘦肉煲足四個鐘，米粒爆花而質地較稀，好配合味濃的魚肉。
和味四寶粥（$38）
內有魚腩、魚嘴、魚骨、魚卜，料多過粥。
魚腩粥（$25）
啖啖肉，適合怕骨的客人，是店中熱賣粥品。
鯪魚球，口感較實，$20/4粒；後面是爽滑鯇魚皮，爽脆得像在齒間彈跳一樣，$17。
和味生滾粥（27830935）
地址：佐敦吳松街75號