2009你說你需要心靈雞湯，放心，美食集團很快會推出一蚊一煲老火冰鮮雞湯，明益街坊荷包，對頹唐不振的你，該有佐益。你一匙一匙嗒真這煲頭啖湯，終於睇通了未來這一年的前景，你發現，坐艇也不壞，金融海嘯打沉不少有銀族，你未衰到落地底，不必攬住浮木等運到，還有艇可坐，絕對不是鐵達尼號。身家縮水八成後，縮骨的親戚朋友不再佔你便宜問你借錢，這一縮，拉上補下，你計過以前欠債不還的爛賬，對比之下，冇乜大損失。
你預計很快歸入裁員隊伍，就當做提早退下火線，嚮往的退休生活即將展開，你唔恨餐餐食鮮雞，唔鍾意睇蔡瀾，對米芝蓮嗤之以鼻，用老翻LV一樣咁姣咁開心，日子根本唔難過。慳自己唔慳小朋友，但你痛定思痛，名校和國際學校不是100%保你子弟成功的，藍天白雲之下，節衣縮食的你把孩子送去鮮魚行學校念書，驚喜地發現放學還有臘腸帶回家加餸，讓你重溫獅子山下風情。
捫心自問你未必保得住「士象全」，但你仍能啖臘味飯，不怕痛風，忌諱腳痛倒台的曾特首肯定羨慕死你。