睇咗《葉問》未？唔該咪問，我除夕夜仲喺度打緊稿！不過，我約咗少林寺第32代弟子、喺《葉問》演一名武癡嘅釋行宇出嚟試車，現場睇佢起飛腳高過架LandCruiser，心都離埋。
肌肉人遇上肌肉車，「巨型有肌肉感，好夠力。我都係用豐田吉普車，比較耐用……」
講車經，一定易答過我問佢甄子丹定吳京好打啲。
文：嘴嚼爺
攝影：林栢鈞
駛出真功夫
拍過《功夫》做十二路譚腿咕哩強、《導火線》喺大牌檔激到甄子丹鬼死咁嬲、《黑拳》又做K1拳王箝住吳京嘅釋行宇，真人相當友善，大大隻說話不多，近排忙做《葉問》宣傳，農曆年後先再開戲，「新年會回去少林寺修練。」仲練？唔講唔知，原來滿身肌肉嘅釋行宇唔多玩健身，只會練功，「因為做健身會令動作變慢。」仲話動作快對揸車都有幫助，佢一邊做單手捽軚動作一邊講：「動作快反應快，控制車子也會好一點。」更試過因為好身手而避過一劫，「年輕時當然會想開得快一點，一次撞車，車子都報銷了，但我只是皮外傷，我相信是因為我反應快吧。」係咪用羅漢拳鞭開側邊架車再運行十二層金鐘罩頂級功力撐住個車身，繼而以大力金剛指篤爆個AirBag？釋行宇無理我：「開快車真的很危險，所以現在都以安全為先。」
還俗依然齋
釋行宇個名咁禪，法號嚟？「係我入少林時師父替我改的。」李連杰還俗之後都做咗食家娶咗個利智，已經還俗嘅釋行宇，卻繼續齋，旁邊電影公司職員話佢：「佢都盡量食齋㗎。」面對花花世界揀車都依然實用為先，「我喜歡吉普車，車身比較高，視點好一點，而且我的身形駕細小的車子不太舒服。」牌子方面，唔會抗日，「我很喜歡豐田這個牌子，比較耐用，黑色更好，比較低調。我也是駕豐田吉普車，但不及這輛巨大。」喜歡嗎？「希望來年拍多一些電影，賺到錢再考慮吧。」腰馬合一果然相當踏實。
勁力豪邁大隻佬
今次拍《葉問》，釋行宇同甄子丹係老友，唔使交手，「練武之人，其實都希望同丹哥切磋。」我極度極度想知道，同甄子丹、吳京都磋過好多嘢嘅佢，覺得邊個好抽啲，「唔，唔，大家風格和經驗都有所不同，和他們交手感覺都很不一樣。」具體少少得唔得？「兩個都好好……」算數，講番揸車，試咗一轉之後覺得點？「坐得好舒服，車廂裝設很豪華，還有冰箱。」馬力呢？「很夠力，而且馬步很穩。」馬步？咁LandCruiser好打啲定你好打啲？「……」我係要問，但佢係都唔理我。
ToyotaLandCruiser規格
引擎：4,663c.c.V8VVT-i
馬力：288ps/5,400rpm
扭力：45.7kgm/3,400rpm
傳動：5前速SuperECT半自動波，恒式四驅
車價：$699,000起
查詢：富利堡（28776700）