神童沈詩鈞前年破格入讀浸大數學系，轉眼已經完成第一年大學課程，開始第二年大學生活。八方近日同浸大中人傾開偈，好奇問吓呢位最年幼大學生近況，浸大人同八方講，詩鈞係乖學生，唔似得一般大學生咁頻頻走堂，只係近排見佢多數獨來獨往去飯堂、圖書館，以前佢有爸爸接送陪返學，𠵱家好似唔多見呢啲場面。八方認為佢少見多怪，詩鈞今年應該11歲，咁大個仔，學得獨立啲都好正常。
神童跳級讀大學，有人擔心揠苗助長反而影響成長，犧牲童年無憂無慮日子，做天才都冇意思。浸大中人話詩鈞應該適應到大學生活，成績亦唔錯，雖然平時唔多見佢同其他哥哥姐姐玩，但冇所謂吖，因為唔係個個大學生都掛住hea唔讀書嘅，好多學生「潛」埋讀書，有時少啲課外活動亦唔係壞事。
參加美國大學入學試
據佢講，早前詩鈞向同窗透露，爸爸陪佢參加一啲美國大學入學面試，結果如何不得而知，而呢個消息，聞說校內高層都已有所聞，校長吳清輝甚為緊張，因為前年拍板取錄詩鈞時，浸大度身訂做一個五年制數學學士及碩士課程畀神童，希望用五年時間打造香港最年輕碩士，為浸大寫下光輝歷史，一旦詩鈞跳槽，便前功盡廢。
良禽擇木而棲，魚不過塘不肥，好多球星只要傾啱價錢，就會蟬過別枝，學海無涯，神童希望喺學術上追求更高境界，精益求精無可厚非，不過浸大花咁多心機招攬神童，當然唔想佢轉校啦。有人笑言校長可能要出更多精力栽培神童，至於係咪不惜工本，唔計較花幾多人力、物力，校內高層真係傷腦筋嘞。
前年詩鈞喺英國高考，數學、進階數學攞A，統計學攞B，AdvancedExtensionAward（AEA）數學試考獲良後，香港幾間大學都有向佢招手，神童唔揀港大、唔入科大，選擇浸大，相信對浸大係有感情嘅。想神童留低，唔可以只係留住佢個人，一定要綁住個心，八方建議浸大即刻諮詢神童，睇睇如何改善校園設備，校長仲要盡快同詩鈞爸爸傾傾，八方相信萬大事有商量，總之有求必應，佢要玩騎牛牛都唔好擰頭，神童唔係一般人，你估容易湊㗎！
mailto:[email protected]