帶三隻大唐狗出街影相，很多顧慮，「灣仔狗公園？星期日太多狗，唔好！」「大帽山山頂？無車去唔到喎。」最後扑槌人迹罕至的馬頭圍配水庫附近山頭。女主人話：「佢哋係野狗。」對，在鬧市無處容「跑」，滿佈草叢的山頭，才是牠們世界。
記者：許維雅
攝影：陳陶鈞（部份相片由狗主阿南提供）
大家姐𡃁仔（2歲）
性別：女
品種：唐狗
原產地：鰂魚涌露天停車場原居民
身價：$0（買足半年叉燒飯餵佢食，才跟回家）
二家姐Worry（1歲）
性別：女
品種：唐狗
原產地：不詳
身價：$0（從愛護動物協會免費領養）
細佬DeeDee（半歲）
性別：男
品種：唐狗
原產地：不詳
身價：$0（從愛護動物協會免費領養）
分工合作各有崗位
養唐狗如此冷門，又遭人歧視，為何還越養越多？阿南：「第一隻係𡃁仔，喺露天停車場見到佢，好乖好有性，餵咗半年都無人要，看更又唔想養佢，所以咪執佢返屋企囉。嗰時心諗，養一隻同養兩隻都無分別，都係要趕返屋企照顧，所以就帶𡃁仔去愛護動物協會揀朋友，咁就領養埋Worry嘞。𡃁仔同Worry都係女，我又領養多隻男仔保護佢哋，最後咪多埋細佬囉，不過三隻真係極限㗎喇。」
三隻無血緣關係的唐狗，雖然前後腳入屋，但手足情深，各有各崗位，「𡃁仔經歷過流浪日子，所以最生性；Worry性格比較難專注，有時唔聽話叫唔到佢返嚟，𡃁仔就會發揮大家姐本色，走埋去鬧佢咬佢。未養DeeDee前，Worry半夜瞓門口，𠵱家輪到DeeDee瞓，最細嗰個負責看門口。」這樣忠心，又懂得分工合作各守崗位，是否純種已是次要，難怪Iris說：「買最好畀最好嘅嘢佢哋，我唐狗當名種狗養㗎嘞。」
養大狗嗌大交
驟看與街邊唐狗無異，留心觀察才發覺𡃁仔、Worry和DeeDee肌肉充滿線條美，因為愛跑愛跳，練得一副好身材。進入人煙稀少的馬頭圍配水庫山路，狗主Iris和阿南才敢放繩，三姊弟立刻向山坡草叢狂奔，天生屬於山頭野嶺。
要帶牠們出街玩是苦差，被名種狗狗主歧視、路人喊驚、球場公園又禁止狗隻進入。Iris感慨：「我盡量每星期帶佢哋行山，平日落街無乜地方畀佢哋跑，我住觀塘，見康寧道有幾個球場無人用又唔入得，覺得好嘥，所以同班狗主商量，準備入紙申請改為狗公園。」養狗付出的時間心機是意料之內，與其他人開戰謾罵屬意料之外，「帶大狗出街，周不時有人問我三隻狗咬唔咬人，我答唔咬佢哋又唔信，最後多數鬧交收場，成班狗主都話養大狗，預咗同人鬧好多交。」
主人私相簿
阿南本身是攝影師，周不時帶三姊弟行山，手痕會拍下照片──
