年近歲晚，唔少影音商都把握搶錢機會，推新一代嘅全高清電視iDTV，睇到小藍眼花撩亂，都唔知點揀。亞洲高清協會幹事Alan話，現時一線日本品牌都出埋iDTV，真係消費者係老闆，大把有得揀。佢話呢啲內置數碼廣播解碼器嘅iDTV，以同一品牌計，質素同冇內置解碼器嘅電視冇分別，最大優點係使用方便，但價錢就貴好多。
未有錄影功能
Alan舉例講，好似有部日本品牌嘅電視機，係同一個規格，裝有內置解碼機比冇內置嘅，價錢貴咗四、五千蚊，「但家吓買部機頂盒，都係一千蚊。」
佢話，假如用家唔介意價錢，只求使用方便，iDTV都係一個唔錯嘅選擇。但要留意𠵱家市面賣嘅iDTV都冇錄影功能。外置機頂盒嘅好處係，只要加硬碟就可以錄影。
佢又話，𠵱家買電視除咗考慮係咪內置解碼器，仲要考慮埋佢嘅動態解像度。𠵱家好多款電視機都係全高清，畫面達1080p，睇靜止畫面一定靚，但影像移動緊畫面會變得好矇。新一代嘅電視機為咗改善移動畫質，都會加強動態解像度，由每秒50格或60格畫面（50Hz/60Hz），增加一倍到100格或120格（100Hz/120Hz）。
消費者買電視機一定要睇動態解像度有冇增線。即使有增線，仲要睇清楚移動嘅畫面夠唔夠自然，「有啲機增咗線，但影像好假，揀電視嗰陣要落足眼力即場比較。」
逢周六刊出