09年第二日，一班城中大孖沙雲集，邊個咁有face請到咁多人？之唔係相識滿天下嘅東亞銀行主席李國寶。噚日東亞舉行慶祝90周年酒會，趁機掃走舊年銀行擠提兼發出盈利警告嘅衰氣，仲廣邀寶哥哥喺政經界嘅高官及富豪老友，大孖沙亦都畀面講吓新年願望。
舊年超人李嘉誠喺東亞銀行最唔掂嘅時候，高調入股以示支持，買咗幾多貨不得而知，寶哥哥好感恩，噚日親自落樓下迎接超人，企足廿分鐘，誠意十足。新年伊始，超人拋出「希望全國都好」宏願，講到經濟，超人話當然希望向好啦，但大家要作最懷打算，因為仲有好多挑戰。
郭炳江望全民就業
新地副主席郭炳江話：「希望全民就業！」佢預計今年經濟比08年差少少，但唔影響佢哋賣樓；細劉劉鑾鴻就唱反調，祝「大家都好」外，佢話：「我哋（對09年經濟）唔係睇得太差，平穩有平穩嘅做法，唔使咁擔心。」
新世界彤叔睇好，認為今年比08年好好多，衰氣已經走晒，賭王就希望啲垃圾吹晒去南邊，港人個個搵大錢，南邊即係邊度，佢冇講清楚。遠東發展副主席邱達昌扶住老竇邱德根進場；富豪酒店太子女羅寶文亦傍實爹哋羅旭瑞，父女齊心，話希望新一年世界和平，寶文加多句：「經濟復蘇」。